دكتور نسا (عامية)

دكتور نسا..أيوة أنا دكتور نسا..

باقبض فلوس بالكوم..حياتى كويسة..

بس الحكاية من البداية كانت فقيرة مفلسة .

هاحكى الحكاية صوت و صورة كلها..

و عشان حبايبى باللغات فيديو و ساوند

بدأت حكايتى بالراوند..

إحساس غريب من أول اليوم ضمنى..شىء غمنى..

كان الصريخ يخنق ودانى كل يوم..و لقيتنى عايش فى الجحيم..

بآكل نسا..و اشرب نسا..

و ان جيت مرضت فى يوم يكون عرق النسا..

حتى فى أحلامى هموم طلق و وجع..

ستات بتصرخ من الألم أو من الدلع..

شهرين و انا عايش كدة و آدى النسا .

بعد التعب كملت حكايتى بالعجب..يوم الامتحان..أول سؤال:

إزاى بدون ما الست تنطق كلمة تعرف سنها و عدد العيال؟..

ثانى سؤال:إزاى تفرق حمل كاذب من حقيقى فى الجمال؟..

مالى أنا و مال الجمال !!..ثالث سؤال:

الست لما بتيجى تولد تبقى جاية لنا برجليها اليمين و الا الشمال..شفتوا الخيال؟

و قريت جميع الأسئلة..المسطرة مالقتش سطر تسطره

حتى القلم داب جوة جيبى من الكسوف..

أما أنا فسكت من كتر الطلاسم و الحروف زى الصنم..

و كأنى وسط الإمتحان أصبحت انا تمثال هبل..

و ملانى فجأة شعور غريب..إحساس طراوة أو بلل .

و خرجت مش عارف طريقى و سكتى..

و لقيتنى باتكعبل فى نمرة جزمتى..

و فى بيتى لما قالولى عال الإمتحان؟ انا قلت عال اطمنوا..

أصل ابنكم أستاذ نسا .

يوم النتيجة لقيت درجتى منورة..ثلاثين تمام..ناقصين كتير..

لكن قعدت بحسرتى من غير كلام..

و لقيت بشر جايبين نمر قرب النهاية..

فقلت:يمكن إحنا بس الأغبيا أو محسوبين ضمن البقر.

و سألتهم قام رد سوسو و قال مذاكر من قناة النيل دروسه..

أما توتو ماسابش أى كلام حريم فى اليوم يفوته..

بس ميمى عبقرى العلم الحريمى كان مقطع من المذاكرة ياناس هدومه .

شفتوا أسرار النجاح؟ قربت أطلع من هدومى..

النهاية..ما علينا..سيبنا من الماضى الأليم..

ربك كريم..ستار حليم..و لا حد عنده بيتنسا..

بعد السنين رغم الأسى..

اتحققت لى المعجزات..

و بقيت أنا..دكتور نسا

**************

أحمد خيري سليم